Ils sis champs da cumpetenza represchentan il rom a moda cumplessiva e descrivan, co ch'ins duai ir enturn activamain cun musica. Els vegnan mess en connex in cun l'auter ord pliras perspectivas ed a moda multifara. Ils champs da cumpetenza "process creativs" (MU.5) e "pratica da la savida musicala" (MU.6) ston vegnir colliads cun tut ils champs da cumpetenza per intermediar a moda perceptibla process creativs e cuntegns teoretics da la musica.
Mintga champ da cumpetenza è dividì en accents tematics che faciliteschan l'orientaziun entaifer il champ da cumpetenza.
Chantar e discurrer
En l'emprender musical applitgeschan las scolaras ed ils scolars lur vusch a moda multifara, tras quai ch'els sviluppan ina relaziun cun lur vusch persunala e sa vesan sco individi, cur ch'els s'expriman cun la vusch (scolaziun da la vusch). Els chantan tant en il chor sco era solisticamain en l'ensemble e s'acquistan in repertori multifar.
Las scolaras ed ils scolars s'orienteschan acusticamain en il temp ed il spazi, emprendan da tadlar intenziunadamain e san differenziar tranter exempels da l'istorgia da la musica, dal temp actual e da differents spazis culturals. Els s'occupan cun l'impurtanza e la funcziun da la musica da lur conturns sco era en las medias.
Las scolaras ed ils scolars emprendan da s'exprimer cun lur corp e d'entrar en in dialog cun la musica. La percepziun differenziada dal corp è il fundament per il svilup sensomotoric sco basa per ir enturn cun musica sa referind a l'agir.
Las scolaras ed ils scolars fan musica cun differents instruments e funtaunas da tuns simplas sco era cun agid da la percussiun dal corp. Il far musica in cun l'auter ed in suenter l'auter, l'interacziun tranter "singul" ed "ensemen" furman ina basa per furmas da communicaziun nunverbalas.
Las scolaras ed ils scolars furman lur creativitad tras quai ch'els sa fan valair sco persuna, sa laschan en sin process creativs en gruppa e sviluppan atgnas ideas. Els exploreschan, experimenteschan ed improviseschan cun il corp, la vusch, il ritmus, il tun sco era cun differents instruments e mediums. Creaziuns elavuradas pon vegnir preschentadas en classa u davant pliras classas.
La finamira da la teoria elementara da la musica en la scola populara è quella da render perceptiblas structuras musicalas. Quai na po betg succeder a moda isolada, mabain en cumbinaziun permanenta cun praticas musicalas dals auters champs da cumpetenza. Las scolaras ed ils scolars s'acquistan la teoria elementara da la musica a moda orientada a l'agir ed a la pratica.
